د اوبو او انرژي وزیر صاحب له خپلې ژمنې سره سم د کابل پوهنتون له ممتازو زدهکړیالانو سره د هغوی د ګومارنې په پار وکتل
۱۴۴۸/۳/۱۹ هـ ق مطابق ۱۴۰۵/۶/۱۱ هـ ل
د اوبو او انرژي وزیر محترم الحاج ملا محمد یونس اخندزاده صاحب، نن په خپل کاري دفتر کې د وزارت د اوبو معین محترم مجیب الرحمن اخندزاده صاحب،د کابل پوهنتون د مالي او اداري مرستیال محترم مولوي اسدالله فرید او د وزارت د مرکزي رئيس صاحبانو په شتون کې د کابل پوهنتون له ممتازو زدهکړیالانو سره چې څه مودې وړاندې د هغوی په فراغت غونډه کې ګډون کړی وو، او له هغوی سره یې په اوبو او انرژي وزارت کې د ګومارنې ژمنه کړې وه، وکتل او خبرې اترې وکړې.
په یاده لیدنه کې، د اوبو او انرژي محترم وزیر صاحب د یادو زدهکړیالانو له علمي بریاوو او لاسته راوړنو څخه خوښي څرګنده کړه او د ځوانو او مسلکي کادرونو پر ملاتړ یې ټینګار وکړ او هغوی ته یې ډاډ ورکړ چې له خپلې پخوانۍ ژمنې سره سم به په اوبو او انرژي وزارت کې د هغوی د ګومارنې زمینه برابره ده.
د اوبو او انرژي محترم وزیر صاحب له ممتازو زدهکړیالانو سره په خبرو کې وویل چې لوستي او مسلکي ځوانان د هېواد ارزښتمنه پانګه ده او ځوانان هم باید د افغانستان د پرمختګ او ځانبسیاینې په برخه کې خپلي علمي وړتیاوې په کار واچوي .
