کندهار ولایت کې د یوې پروژې چارې د اوبو او انرژي وزیر په شتون کې د ۱۱۰ میلیونه افغانيو په لګښت پیل شوې
د کندهار ولایت د کښته میوند ولسوالي په بند تیمور سیمه کې د یوې پروژې چارې د ۱۱۰ میلیونه افغانیو په لګښت د اوبو او انرژي وزیر محترم الحاج ملا محمد یونس آخندزاده، انجنیر اسدالله عمار، د وزارت د انجنیري جوپړتیاوو رئيس، د کندهار د سیندیزې فرعي حوزې رئيس محترم ملا سید محمد شرافت او د میوند د مرستیال ولسوال په شتون کې پیل شوې.
په دغه پروژه کې د ۱۱۰۷ متره په اوږدوالي یو کانال، د ۲۰۰ متره په اوږدوالي سربند، د ۶۰۰ متره په اوږدوالي استنادي دېوال، ۵ پلګوټي او یو واش او دوه سریزې ودانۍ شاملې دي.
په دغه پروژه کې سلګونو کسانو ته د کار زمینه چمتو شوې، او د چارو په بشپړېدو سره به یې ۱۸۰۰ هکتاره کرنیزه ځمکه خړوبه شي.
د نوموړې پروژې چارې د اوبو او انرژي وزارت له پراختیایي بودجې څخه د حمید مینهوال ودانیز شرکت له لوري پرمخ وړل کېږي، چې چارې به یې د ۱۴ میاشتو په موده کې بشپړې او ګټې اخیستنې ته وسپارل شي.
