د افغانستان د اسلامي امارت د اوبو او انرژي سرپرست وزیر د ازبکستان د انرژي پنځم نړیوال کنفرانس کې د ګډون په موخه تاشکند ته ولاړ
د افغانستان د اسلامي امارت د اوبو او انرژي سرپرست وزیر محترم الحاج ملا عبداللطیف منصور او ورسره مل پلاوی د ازبکستان د انرژي پنځم نړیوال کنفرانس کې د ګډون په موخه چې د ۲۰۲۵ زیږدیز کال د می میاشتې له ۱۳ تر ۱۵ نیټې پورې په تاشکند کې ترسره کېږی، دغه ښار ته ولاړ.
دغه کنفرانس چې د "دوامداره انرژي لپاره د سیمه ایزې همکاري" ترسرلیک لاندې ترسره کېږي، د انرژي په برخه کې د سیمه ایزې همکاري ستراتیژیو، د پرمخ تللې انرژي بازار رامنځته کولو او شنه اقتصاد ته لېږد په هکله د اندونو د تبادلې لپاره ښه فرصت چمتو کوي.
نوموړی کنفرانس د انرژي په برخه کې د سیمه ایزې همکاري د پیاوړتیا، په ګډو پروژو کې د پانګونې لپاره د فرصتونو ارزولو، د سیمه ایزې انرژي بازار پراختیا او شنې ټکنالوژي لېږد په برخه کې د تجربو تبادلې، په مرکزي آسیا کې د برېښنا او ګاز لېږد پروژو کې ګډون او له نوې کېدو وړ انرژي څخه د ګټې اخیستنې او په اوبو او انرژي پروژو کې د ننګونو کمولو حل لارو چارو په هکله ترسره کېږي.
په دغه کنفرانس کې د افغانستان د اسلامي امارت د اوبو او انرژي سرپرست وزیر ګډون به د اوبیزو او انرژي پروژو کې له ازبکستان سره د دوو اړخیزو همکاریو د پراختیا، د انرژي سرچینو د مدیریت په برخه کې د سیمه ایزو هېوادونو له تجربو څخه ګټه اخیستنه او په افغانستان کې د انرژي په برخه کې د بهرنۍ پانګونې د جذب لامل شي.
د افغانستان د اوبو او انرژي سرپرست وزیر به په دغه کنفرانس کې د اړینو موضوعاتو لکه د انرژي او نوې ټکنالوژي په برخه کې د همکاریو د غورهوالي او په دې برخه کې د شته ننګونو په هکله خبرې، اترې وکړې.
د یادونې وړ ده، چې دغه کنفرانس د ازبکستان، قزاقستان، ترکمنستان، روسیې او د سیمې د نورو هېوادونو او نړیوالو سازمانونو لکه دنړیوال اټومي انرژي آژانس او نړیوال بانک د استازو په ګډون ترسره کېږي.
