د پکتیکا ولایت د پلتوني بند د جوړونې چارې پيل شوې
د پکتیکا ولایت د پلتوني بند د پروژې چارې د 851 میلیون افغانیو په ارزښت د ریاست الوزرا د اقتصادي مرستیال محترم الحاج ملا عبدالغني برادر، د اوبو او انرژي د سرپرست وزیر محترم الحاج ملا عبداللطیف منصور، د دغه وزارت د اوبو معین محترم مجیب الرحمن عمر آخندزاده، د پکتیکا مرستیال والي محترم الحاج مولوي مخدوم عبدالسلام سعادت، د اسلامي امارت د لوړ پوړو مسؤلینو او د پکتیکا ولایت د ګڼ شمېر اوسیدونکو په شتون کې پرانیستل شوې.
د ریاست الوزرا اقتصادي مرستیال د دغې پروژې د پرانیستې په مراسمو کې د اوبو او انرژي وزارت یو شمېر پروژو ته په لنډه توګه اشاره وکړه او د هغوی د حیاتي ارزښت د یادونې ترڅنګ یې ټینګار وکړ، چې د افغانستان اسلامي امارت د هېواد د اوبو مدیریت ته ژمن دی.
په ورته مهال، د اوبو او انرژي سرپرست وزیر د پلتوني بند ارزښت ته اشاره وکړه او یادونه یې وکړه، چې دغه پروژه د موسمي سیلابونو د کنټرول، د اوبو سرچینو د مدیریت او پياوړتیا، د کرنیزو ځمکو د خړوبولو او د برېښنا د تولید په موخه پلي کېږي.
همدغه راز، د ملي پراختیا شرکت رئيس محترم عبدالرحمن عطاش ژمنه وکړه، چې نوموړې پروژه به په ښه کیفیت او ټاکلي وخت سره پلي کړي.
همدارنګه د اوبو او انرژي وزارت د مقام سلاکار محترم ډاکټر فاروق اعظم دغه پروژه د اوبو د مدیریت په برخه کې ارزښتناکه او د پکتیکا ولایت د خلکو لپاره حیاتي و بلله.
د یادونې وړ ده، چې د پلتوني بند د 41.2 متره په لوړوالي د 25 میلیون متره مکعب اوبو د زېرمه کولو او په ساعت کې د 935 کیلو واټ برېښنا د تولید وړتیا لري او همدارنګه دغه بند 2500 هکتاره کرنیزه ځمکه خړوبوي.
