د اوبو او انرژي وزارت کارکوونکو ته د دعوت او ارشاد سمینار د دغه وزارت په عمومي تالار کې جوړ شو.
دغه سيمينار چې د کارکونکو د ديني پوهې د کچې د لوړولو او د اسلام د سپېڅلي دين د لارښوونو د زده کړې په موخه جوړ شوی وو د اوبو او انرژي وزارت د پنځو رياستونو کارکوونکو په کې برخه اخيستې وه.
سیمینار د قران عظیم الشان د مبارکو آیاتونو په تلاوت سره پیل شو. ورپسې د اوبو او انرژي وزارت د دعوت او ارشاد رئیس مولوی ګل الرحمن "عارف" د قران کریم د مبارکو آیتونو او احادیثو په اقتباس سره د لمانځه د اهمیت او کیفیت په اړه خبرې وکړې.
محترم شیخ مفتي احسان الله "ابوالفیضان" د ژوند په چارو کې د الهي احکامو د عملي کولو او د رسول الله صلی الله علیه وسلم د سنتو د پیروي په اهمیت خبرې وکړې او ټول کارکوونکي یې وهڅول چې د اسلام دین زده کړي او د ژوند په ټولو چارو کې یې عملي کړي.
د یادولو وړ ده چې د دې ادارې لخوا په ځلونو د اوبو او انرژي وزارت د کارکوونکو لپاره د دعوت او ارشاد سیمینارونه جوړ شوي او په راتلونکي کې به هم دوام وکړي ترڅو د وزارت ټول کارکوونکي له دغو سیمینارونو څخه ګټه واخلي.
