میدان وردګو ولایت کې د څه باندې اووه میلیونه افغانیو په لګښت د قره قل کوچني بند د جوړېدو د بنسټ ډبره کیښودل شوه
د میدان وردګو ولایت په مرکز بهسودو ولسوالي کې د 7.3 میلیونه افغانیو په لګښت د یوه کوچني بند د جوړولو د بنسټ ډبره د میدان ښار سیندیزې فرعي حوزې رئیس مولوي عبدالصمد حلیم، د یادي ولسوالي ولسوال او یو شمیر نورو سیمه ییزو مسئولینو په شتون کې کیښودل شوه.
یاد بند د اوبو او انرژي وزارت په مالي لګښت د یوه داخلي شرکت له لوري د 7 مترو په لوړوالي او 84 مترو په اوږدوالي سره جوړیږي، چې د شاوخوا 70000 متره مکعب اوبو د زیرمه کولو وړتیا به ولري.
د یادوني وړ ده، چې تیر کال د میدان وردګو ولایت په پنځو ولسوالیو کې د پنځو کوچنیو بندونو د جوړولو چارې بشپړې شوې او سږکال درې نور کوچني بندونه په مرکز بهسودو، لومړۍ حصه بهسودو او دایمیرداد ولسوالیو کې جوړیږي.
