د ساکو افغان او احمدزي افغان شرکتونو مسؤلینو د برېښنا د تولید په پروژو کې پانګونې ته لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د ساکو افغان او احمدزي افغان شرکتونو له مسؤلینو سره وکتل او د انرژي د تولید په پروژو کې د پانګونې په هکله خبرې، اترې وکړې.
په دغه لیدنه کې، د اوبو او انرژي سرپرست وزیر نوموړو شرکتونو ته وړاندیز وکړ، چې د سروبي۲ برېښنا بند په پروژه یا د للندر شاتوت بند په پروژه کې چې له حیاتي ارزښت څخه برخمن دي، پانګونه وکړي.
همدارنګه د اوبو او انرژي سرپرست وزیر د نوموړو شرکتونو له مسؤلینو څخه وغوښتل چې ډېر ژر دې خپل پروپوزل له دغه وزارت سره شریک کړي، ترڅو وروستي اقدامات د دواړو لورو په همغږي او هوکړې سره پیل شي.\
