ارزګان ولایت کې د آغاجان بند د تفصیلي ډېزاین او امکان سنجي مطالعې د ترسره کولو پروژه پرانیستل شوه
دغه پروژه د ریاست الوزرا اقتصادي مرستیال محترم الحاج ملا عبدالغني برادر آخند، د اوبو او انرژي وزارت سرپرست محترم الحاج ملا عبداللطیف منصور، د ارزګان والي الحاج مولانا عنایت الله شجاع، د اوبو او انرژي وزارت د مقام سلاکار ډاکټر فاروق اعظم، د ملي پراختیا شرکت مرستیال مولوي عبدالولي عادل، د اسلامي امارت لوړ پوړو چارواکو او د ارزګان ولایت ګڼ شمېر ځایي اوسېدونکو په شتون کې پرانیستل شوه.
د ریاست الوزرا اقتصادي مرستیال د دغې پروژې د پرانیستي پرمهال په اوسني شرایطو کې د اوبو د مدیریت اهمیت ته اشاره وکړه، د دغې پروژې پلي کول یې د اوبو مدیریت، د زراعت او د اقتصاد د پراختیا لپاره ارزښتمن ګام وباله.
په همدې حال کې د اوبو او انرژي وزارت سرپرست د آغاجان بند پروژې په پرانیست غونډه کې څرګنده کړه چې سربېره پر دې پروژې، په نږدې راتلونکي کې به درې نورې پروژې هم چې د سولري برېښنا تولید، د کجکي له بند څخه د بریښنا د لین لېږد او د شفلوغ بند جوړول پکې شامل دي، په ارزګان ولایت کې د اوبو او انرژي وزارت له لورې پیل شي.
له بلې خوا د اوبو او انرژي وزارت سلاکار ډاکټر فاروق اعظم، اوبه د الله تعالی بې بدیله نعمت وبالۀ او ټینګار یې وکړ چې اوبه په اوسنیو حالاتو کې له ځانګړي اهمیت څخه برخمنې دي.
د یادونې وړ ده چې په ارزګان ولایت کې د آغاجان بند پروژه د اوبو مدیریت، د زراعتي ځمکو د خړوبولو په موخه پلي کېږي، چې دغه بند د څه د پاسه د ۷۰ میلیونه متر مکعبه د اوبو د ذخیره کولو ظرفیت لري، چې ۷ زره هکتاره زراعتي ځمکه به د خړوبولو لاندې ونیسي.
