د اوبو او انرژي وزارت د اوبو معین په کابل کې د ایران اسلامی جمهوریت د سفارت له مستشار سره وکتل
د اوبو او انرژي وزارت د اوبو معین ښاغلي مجیب الرحمن عمر آخندزاد د خپل کار په دفتر کې د ایران اسلامي جمهوریت د سفارت له مستشار ښاغلي حسن شیرازي سره لیدنه ترسره کړه او د شاه و عروس بند پروژې د ستونزو د هوارولو او د پاتې چارو د چټکتیا په اړه بحث او د نظر تبادله وکړه.
په یاده لیدنه کې دواړو لورو دکابل د خلکو لپاره د شاه وعروس بند پروژه بنسټیزه وبلله او د ستونزو د حل او د پاتې کارونو پر چټکتیا باندې یې ټینګار وکړ.
د اوبو او انرژي وزارت د اوبو معین د ایران اسلامي جمهوریت د سفارت مستشار ته د ښه راغلاست ترڅنګ وویل چې د شاه و عروس بند پروژه د مهمو پروژو څخه ده، چې د اسلامي امارت په کابینه کې ورته لومړیتوب ورکړل شوی او بودجه یې تصویب شوې؛ له همدې کبله د قراردادي شرکت څخه تمه کېږي چې د یاد بند پاتې چارې ژر تر ژره بشپړې کړي.
په ورته مهال ، د ایران د سفارت مستشار د یادې پروژې د تطبیق په برخه کې د همکاري ډاډ ورکړ او ویې ویل چې د ایران د سفارت له خوا به د اړتیا وړ همکاري ترسره شي.
په پاي کې دواړو لورو هوکړه وکړه چې د اوبو او انرژي وزارت تخنیکي مسئولین د ایران د سفارت له مسئولینو او د قراردادي شرکت له استازو سره د پروژې د ستونزو د حل او د پاتې کارونو د چټکتیا په موخه یوه ناسته ترسره کړي.
