په هېواد کې د انرژي د تولید د پروژو د پلي کیدو په موخه د پاورچاینا (Power China). شرکت له استازي سره د همغږي ناسته ترسره شوه
د اوبو او انرژي وزارت سرپرست وزیر ښاغلي ملا عبداللطیف منصور د خپل کار په دفتر کې د پاور چاینا(Power China) شرکت له استازي سره ناسته ترسره او د انرژي د تولید د پروژو د پلي کیدو په برخه کې یې د پانګونې لپاره پر لازمې همغږي باندې بحث او دنظر تبادله وکړه.
په دغه ناسته کې، د اوبو او انرژي وزارت سرپرست وزیر په افغانستان کې د یاد شرکت د پانګونې له لیوالتیا څخه د انرژي د تولید په پروژو باندې هر کلی وکړ او د لازمې همغږیو په چټکتیا او د عملي کړونو په پیلولو يې ټینګار وکړ.
ښاغلي منصور د نوموړي شرکت استازي ته د د پروژو د پلي کیدو په برخه کې د هر راز همکاري ډاډ ورکړ او له هغوی څخه یې و غوښتل چې ژر تر ژره دې خپل پروپوزل چمتو او د وزارت له رهبري سره دې شریک کړي، ترڅو د یاد شرکت پروپوزل ته په کتو دواړه لوري د تړون د لاسلیک کیدو په طی مراحلو او د عملي کړنو په ترسره کولو باندې لاس په کار شي.
په ورته وخت کې، د پاور چاینا شرکت استازي د اوبو او انرژي وزارت د رهبري له اعتماد څخه په قدرداني سره یادونه وکړه، چې ډیر ژر به د دوی تخنیکي ټیم د وزارت له تخنیکي ټیم سره په ګډه د پروژو د پلي کیدو ساحې له نږدې څخه د مطالعې لاندې ونیسي او له هغه وروسته به خپل پروپوزل په کره او اقتصادي ډول د وزارت له رهبري سره شریک کړي.
د یادولو وړ ده، چې څه موده وړاندې د اوبو او انرژي وزارت او د پاورچاینا شرکت سره د همکاري هوکړه لیک لاسلیک شوی او تر هغه وروسته تر اوسه پوري څو ګډې تخنیکي او د همغږي ناستې د دواړو لورو ترمنځ ترسره شوې دي.
