د اوبو او انرژي وزارت د کارکوونکو د ماسټري پروګرام د غوره مدیریت د پلي کیدو په هکله ګډه ناسته ترسره شوه
دا ناسته د اوبو او انرژي وزارت د اوبو معین ښاغلي انجنیر مجیب الرحمن عمر آخند زاده، د پروګرامونو د مرکزي دفتر رئیس او د پولیتخنیک پوهنتون د یو شمېر مسوولینو په حضور کې د دغه وزارت د اوبو معین د کار په دفتر کې ترسره شوه.
په دغه ناسته کې، په پولي تخنیک پوهنتون کې د اوبو او انرژي وزارت د کارکوونکو د ماسټري پروګرام د تطبیق د غوره مدیریت په اړه د اسیا پراختیايي بانک د تمویل په اړه بحث او د نظر تبادله وشوه.
همدارنګه د غونډې په ترڅ کې د اوبو او انرژي وزارت او د پولي تخنیک پوهنتون یوه ګډه کمیټه موظف شوه چې د چارو د لا ښه مدیریت په موخه کار وکړي.
د یادولو وړ ده، چې دا پروګرام مخکي د اوبو او انرژي وزارت، د آسیاپراختیايي بانک او د پولي تخنیک پوهنتون ترمنځ قرار داد شوی و، چې له دې لارې د وزارت تر ۶۰ زیات کارکوونکي کولای شي چې د آسیا پراختیایي بانک په همکاري سره خپل د ماسټري زده کړې په پولي تخنیک پوهنتون کې ترسره کړې.
