لغمان ولایت کې د پاچاجوی کانال د سربند پروژې رغنیزې چارې ۴۰ سلنه پرمخ تللې دي
د لغمان سیندیزې فرعي حوزې ریاست د مسؤلینو تر مشري لاندې د ولایت مقام او د اقتصاد ریاست ګډ تخنیکي ټیم د مهترلام ښار اړوند د پاچاجوی کانال د سربند پروژې د رغنیزو چارو له بهیر څخه څارنه وکړه او اړوندو مسؤلینو ته یې اړینې لارښوونې وکړې.
د دغې پروژې چارې چې د ایف، اې، او موسسې له لوري د ۹۰زره او ۴۴ اعشاریه ۲۵ آمریکایي ډالرو په لګښت د لغمان سیندیزې فرعي حوزې ریاست تر څارنې لاندې پرمخ وړل کېږي، تر اوسه پورې ۴۰ سلنه بشپړې شوې دي.
په دغه پروژه کې د ۶۰ متره په اوږدوالي محافظوي ماس کانکريټ دېوال او ۲۷۰ متره لایننګ او پاکاري شامله ده، چې د چارو په بشپړېدو سره به یې شاوخوا ۱۰ زره جریبه کرنیزو ځمکو ته په منظم ډول اوبه ورسيږي او کابو ۱۵ زره کورنۍ په مستقیم ډول ورڅخه ګټه پورته کړي.
