د غور پورتني هریرود سیندیزې فرعي حوزې او د فیروز کوه ښار د اوبو رسولو خصوصي شرکتونو ترمنځ د همغږۍ ناسته ترسره شوه
دغه ناسته د نوموړې حوزې د رئیس محترم الحاج ملا رحمت الله اماني، تخنیکي ټیم او د فیروز کوه ښار د اوبو رسولو خصوصي شرکتونو د استازو په شتون کې ترسره شوه.
په دغه ناسته کې د غور پورتني هریرود سیندیزې فرعي حوزې رئیس د اوبو د ارزښت او د هېواد د پرمختګ په برخه کې د هغې د رول په هکله هر اړخیزه وینا وکړه او له ټولو شرکتونو څخه یې وغوښتل، چې د اوبو له ضایع کېدو څخه مخنیوی وکړي او په دغه برخه کې دې هېوادوالو ته د پوهاوي ورکولو لپاره همکاري وکړي.
د ناستې په دوام د یادې حوزې د اوبو چارو د تنظیم آمر محترم انجنیر مبشر ګډونوالو ته اوبو او انرژي وزارت د کړنلارې پر بنسټ د اوبو رسولو خصوصي شرکتونو د قانوني کولو او جواز اخیستلو په هکله بشپړ معلومات وړاندې کړل او له هغوی څخه یې غوښتنه وکړه، چې د کړنلارې پر بنسټ دې د خپلو شرکتونو د قانوني کولو پروسه پیل کړي.
د ناستې په پای کې د نوموړو شرکتونو مسئولینو خپلې ستونزې او وړاندیزونه وړاندې کړل او د جواز اخیستلو لپاره یې خپل چمتووالی څرګند کړ.
