د کابل ښار د اوبو د کموالي د ستونزې په هکله مشورتي ورکشاپ ترسره شو
دغه ورکشاپ چې د اوبو او انرژي وزارت له لوري د یونسیف موسسې په مالي همکاري ترسره شو، د اوبو او انرژي وزارت د اوبو سکتور رئيسانو، د یونسیف موسسې د واش برنامې رئيس، د کابل ولایت مقام، د کابل سکتوري ریاستونو ( کرنې او مالداري، کلیو او پراختیا، چاپيریال ساتنې او ښاري اوبو رسولو) استازو پکې ګډون درلود.
د اوبو او انرژي وزارت د اوبو سکتور رئيسانو او د یونسیف موسسې د واش برنامې رئيس د دغه مشورتي ورکشاپ د ترسره کولو موخه د کابل ښار د اوبو سرچینو د مدیریت د غوره والي لپاره د وړاندې شوو طرحو وروستي کول او په دغه ښار کې یې د اوبو د کموالي د ستونزو هوارول وبلل.
د ناستې په بهیر کې، د کابل سیندیزې حوزې عمومي رئيس محترم انجنیر حبیب الرحمن حقپال د کابل ښار د اوبو سرچنیو د وضعیت په هکله پرزنټیشن وړاندې کړ او همدارنګه ګډونوالو د نوموړې موضوع په هکله خپل اندونه وړاندې کړل.
د بحث او اندونو تر تبادلې، د معلوماتو او تخنیکي تجربو تر شریکولو وروسته اړین تصمیمونه ونیول شول، ترڅو په کابل ښار کې د اوبو د کموالي ستونزو د هوارولو طرحې او پروپوزلونه وروستي او په راتلونکي کې د عملي اقداماتو په موخه اغېزمن ګامونه واخیستل شي.
