د افغانستان د اوبو او انرژي وزارت پلاوي د ایران د نوې کېدو وړ انرژي په کنفرانس کې ګډون وکړ
د افغانستان اسلامي امارت د اوبو او انرژي وزارت یوه پلاوي د ایران په بلنه د نوې کېدو وړ انرژي په شپږمې ملي جایزې او د نوې کېدو وړ انرژي په نهم نندارتون او نړیوال کنفرانس کې چې د غبرګولي په ۳ او ۴ نېټه په هغه هېواد کې جوړ شوی وو،ګډون وکړ.
دغه پلاوی د افغانستان د اوبو او انرژي وزارت د نوې کېدو وړ انرژي رئيس محترم انجنیر جان محمد حمزه تر سرپرستي لاندې د دغه وزارت د یو شمېر تخنیکي مسؤلینو او د افغانستان د بهرنیو چارو وزارت استازي وو.
په دغه کنفرانس کې، د نوې کېدو وړ انرژي په برخه کې د افغانستان سیاستونه او برنامې،کورنۍ وړتیاوې، د پانګونې فرصتونه او نړیواله همکاري تشریح شوه. همدارنګه، د افغانستان پلاوي د نوې کېدو وړ انرژي په برخه کې له ایراني فعالو شرکتونو سره خبرې، اترې وکړې. ځینو دغو شرکتونو په افغانستان کې د پانګونې لپاره خپل چمتووالی څرګند کړ.
دغه کنفرانس د متخصصینو، د پوهنتونونو د استادانو او له بېلابېلو هېوادونو څخه د خصوصي شرکتونو د استازو په شتون کې ترسره شوی وو.
