غور ولایت کې د اهلیتې چکډم پروژه د نږدې درې میلیونه افغانیو په ارزښت ګټې اخیستنې ته وسپارل شوه
د غور ولایت په مرغاب ولسوالي کې د اهلیتې چکډم پروژه د دوه میلیونه، نهه سوه، څلور شپېته زره، شپږ سوه او نوې (2964690) افغانیو په ارزښت د غور سیندیزې فرعي حوزې رئيس محترم ملا رحمت الله اماني، د ولایت مقام او د اقتصاد ریاست د استازو او د یو شمېر نورو سیمه ییزو مسؤلینو او ځایي اوسیدونکو په شتون کې ګټې اخیستنې ته وسپارل شوه.
د غور سیندیزې فرعي حوزې رئيس د دغې پروژې ګټې ته د سپارلو په غونډه کې د هغې پلي کول د سیلابونو کنټرول او د ګواښونو د کموالي، د موسمي اوبو د راټولولو، د ځمکې لاندې اوبو د پياوړتیا او په کرنیزو چارو کې ورڅخه ګټه اخیستنه وبلله او پر حفظ او مراقبت باندې یې ټینګار وکړ.
د یادونې وړ ده، چې د اهلیتې چکډم پروژه د غور ولایت په کچه د هغو ۱۲ چکډمونو پروژو له ډلې څخه ده،چې په مرغاب ولسوالي کې د یوه کورني شرکت له لوري د غور د سیندیزې فرعي حوزې تر څارنې لاندې پلي شوي او پکې لسګونو کسانو ته د کار زمینه هم چمتو شوې وه.
