د غزني ولایت د سلطان بند د حفظ او مراقبت پروژې چارې د څه باندې ۱۰۹ یو سل او نهه میلیونه افغانیو په ټولیز لګښت پرانیستل شوې
دغه پروژه نن شنبه د ۱۴۰۴ لمریز کال د چنګاښ میاشتې په ۱۴ نیټه د اوبو او انرژي سرپرست وزیر محترم الحاج ملا عبداللطیف منصور، د غزني والي محترم مولوي عبدالصمد جاوید، سلاکارانو، رئيسانو، قومي مشرانو او د سیمې د ګڼ شمېر اوسېدونکو په شتون کې پرانیستل شوه.
د اوبو او انرژي سرپرست وزیر په دغو مراسمو کې د سلطان بند ارزښت د اوبو د مدیریت او د کرنې د پراختیا په برخه کې حیاتي وباله.
ښاغلي منصور ټینګار وکړ، چې له نیکه مرغه د اسلامي امارت په هڅو سره په هېواد کې شرعي نظام، امنیت، اقتصادې پراختیا، قومي یووالی او د یو بل منلو فضا را منځته شوې، له همدې کبله خلک هم مسؤلیت لري، چې له دغه نظام څخه په اخلاص، اطاعت او وفاداري سره ملاتړ وکړي.
په ورته مهال، د غزني والي په دغو مراسمو کې د اوبو او انرژي وزارت کړنې وستایلې او د سلطان بند پروژه یې د اوبو د مدیریت په برخه کې یوه ارزښتناکه لاسته راوړنه وبلله.
له بلې خوا، د اوبو او انرژي وزارت د مقام سلاکار محترم ډاکټر فاروق اعظم په دغو مراسمو کې وویل، د خوښي ځای دی چې د افغانستان خلک هره ورځ د امن په فضا کې د هېواد په بېلابېلو ولایتونو کې د ټولګټو پروژو د پرانیستې شاهدان دي.
د یادونې وړ ده، چې په دغه پروژه کې د بند لوړوالی د دوه نیمو مترو په اندازې سره، د بند تر ګواښ لاندې سیمو د بیارغونې او ټینګښت، د پاورهاوس جوړونه، د اوبو وتلو پایپونو بیارغونه، د دروازو بیارغونه، د پرچاوو بیارغونه، د چک او کنټرول په موخه پر بند باندې د سانسورونو نصبول ، د بند پر محور باندې د لمریزو ګروپونو نصبول او د ساتونکو د ودانۍ جوړونه شامله ده، چې د یوه کال په موده کې به بشپړه شي.
د دغې پروژې په پلي کېدو سره به د بند لوړوالی له ۳۵ متره څخه ۳۷ اعشاریه ۵ متره او د ذخیرې وړتیا به یې له ۹ میلیون متره مکعب اوبو څخه ۱۳ میلیون متره مکعب اوبو ته لوړه شي، چې په ټوله کې به کابو ۱۰ زره هکتاره کرنیزه ځمکه خړوبه شي.
