د برېښنا مارکیټ د تخنیکي نظارت آمر او ورسره مل ټیم د برېښنا انرژي په برخه کې د فعالو شرکتونو د پېژندنې او د فعالیتونو د ارزونې په موخه ننګرهار ولایت ته سفر وکړ
د برېښنا مارکیټ د تخنیکي نظارت آمر محترم علي جان محمدي او ورسره مل د برېښنا انرژي د چوپړتیاوو د تنظیم عمومي ریاست تخنیکي ټيم د برېښنا انرژي په برخه کې د فعالو شرکتونو د پېژندنې ، د هغوی د فعالیتونو د ارزونې او د دغه شرکتونو د فعالیتونو د قانوني کیدو په موخه ننګرهار ولایت ته سفر وکړ او د ننګرهار له مرستیال والي او د ننګرهار ولایت د اوبو او انرژي له رئيس محترم مولوی سید فضل احد هاشمي سره وکتل.
نوموړو مسؤلینو د ننګرهار ولایت د برېښنا انرژي وضعیت او په دې برخه کې شته ننګونې و څېړلې او د هغو شرکتونو لپاره چې د برېښنا انرژي چوپړتیاوې وړاندې کوي، د جواز په ترلاسه کولو باندې ټینګار وکړ.
همدارنګه، نوموړو مسؤلینو په دغه سفر کې د برېښنا انرژي په برخه کې د دوو فعالو شرکتونو کړنې وڅېړلې او په دې برخه کې به د نورو شرکتونو د پېژندنې لړۍ دوام ومومي.
