د اوبو او انرژي وزارت رهبري د ساداتو سوداګریزې ډلې له مسؤلینو سره په لیدنه کې د کابل ښار د اوبو د برابرولو پروژو په هکله خبرې وکړې
د اوبو او انرژي سرپرست وزیر محترم ملا عبداللطیف منصور او د دغه وزارت د اوبو معین محترم مجیب الرحمن عمر آخندزاده د ساداتو سوداګریزې ډلې له مسؤلینو سره لیدنه وکړه.
په دغه کتنه کې، د ساداتو سوداګریزې ډلې مسؤلینو د کابل ښار د څښاک اوبو د برابرولو په پروژو کې پانګونې ته لېوالتیا څرګنده کړه.
د اوبو او انرژي سرپرست وزیر په کابل ښار کې د څښاک اوبو د برابرولو حیاتي موضوع ته په اشارې سره وویل، چې دغه وزارت کابل ښار ته د څښاک اوبو د برابرولو لپاره د مشخصو برنامو لکه له پنجشیر څخه کابل ته د اوبو د لېږد، شاه او عروس بند، د للندر او شاتوت بند او له جلریز څخه کابل ته د اوبو په لېږد باندې کار کوي.
ښاغلي منصور زیاته کړه، چې د اوبو او انرژي وزارت رهبري له هر شرکت څخه چې وکولای شي د دې برنامې په پلي کولو کې د اوبو او انرژي وزارت سره همکاري وکړي، هر کلی کوي، د اوبو او انرژي سرپرست وزیر ټینګار وکړ، چې د کابل ښار لپاره د څښاک اوبو د برابرولو د موضوع د ارزښت په موخه اړینه ده چې هر څه ډېر ژر عملي چارې ترسره شي.
