لغمان ولایت کې د شاهي کانال د چارو له بهیر څخه څارنه وشوه
د لغمان ولایت د اوبو او انرژي رئيس محترم مولوي شیرجان راشدي او ورسره مل د دغه ریاست تخنیکي سلاکار د شاهي کانال د چارو له بهیر څخه څارنه وکړه او اړوندو مسؤلینو ته یې د چارو د چټکتیا او غوره کیفیت په موخه اړینې لارښوونې وکړې.
د یادونې وړ ده، چې شاهي کانال د لغمان ولایت په الینګار ولسوالي کې موقعیت لري. دغه کانال په ټوله کې د دوو فازونو په درلودلو سره 70 کیلو متره اوږدوالی لري او کابو 20 زره هکتاره کرنیزه ځمکه خړوبوي.
د نوموړې پروژې لومړی فاز د 30 کیلو متره په اوږدوالی سره په څلورو برخو (لاټونو) کې پلي کېږي او کابو ۵ زره هکتاره کرنیزه ځمکه خړوبوي. د دغې پروژې د لومړي فاز لومړۍ برخه 6.6 کیلو متره اوږدوالی لري.
