د هېواد په درې شمالي ولایتونو کې د برېښنا رسولو درې پروژو چارې د نږدې څلور میلیارده افغانیو په لګښت پیل شوې
د برېښنا رسولو دغو پروژو پرانیست غونډه د ریاست الوزرا اقتصادي مرستیال محترم الحاج ملا عبدالغني برادر، د اوبو او انرژي وزیر محترم الحاج ملا محمد یونس آخندزاده، د اوبو معین محترم مجیب الرحمن عمر آخندزاده، د فاریاب والي ملا عبدالاحد فضلي آخند او یو شمېر سیمهایزو مسؤلینو په شتون کې پیل شوې.
د دغه برېښنا رسولو پروژو چارې د جوزجان ولایت په قوشتیپې او درزاب ولسوالیو کې د ۱ میلیارد، ۸۸۶ میلیونه او ۴۷۰ زره افغانیو، د سرپل ولایت په ګوسفندي، سوزمه قلعې او سنګچارک ولسوالیو کې د برېښنا رسولو پروژه د ۸۸۰ میلیونه افغانیو او د فاریاب ولایت په پښتونکوټ، ګرزیوان او بلچراغ ولسوالیو کې د برېښنا رسولو پروژه د ۱ میلیارد او ۱۲۰ میلیونه افغانیو په لګښت پرمخ وړل کېږي.
د دغو پروژو چارې د افغانستان اسلامي امارت له بودجې څخه پرمخ وړل کېږي، چې چارې به یې د درېیو کلونو په موده کې بشپړې، او ګټې ته په سپارلو سره به یې په نوموړو ولسوالیو کې زرګونه کورنۍ د برېښنا له نعمت څخه برخمنې شي.
