په زابل ولایت کې د دوو استنادي دیوالونو د جوړولو چارې د څه باندې ۳۰۰ زره ډالرو په ارزښت پیل شوې
په زابل ولایت کې د دوو استنادي دیوالونو د جوړولو چارې د درې سوه درې څلوېښت زره آمریکایي ډالرو(343000) په ارزښت د زابل مرستیال والي محترم مولوي محب الله حماس، د ترنک قلات سیندیزې فرعي حوزې رئيس محترم مولوي عبدالکریم ذوالفقار او یو شمېر نورو سیمه ییزو مسؤلینو په شتون کې پیل شوې .
د نوموړو پروژو په پرانیست غونډه کې د ترنک قلات سیندیزې فرعي حوزې رئیس د یادو پروژو د اهمیت په هکله خبرې وکړې او زیاته یې کړه، چې یادې پروژې د FAO دفتر په مالي ملاتړ د یادې سیندیزې فرعي حوزې په تخنیکي همکاري پلې کېږي.
یاد استنادي دیوالونه د زابل ولایت په شهر صفا او شاه جوی ولسوالیو کې جوړیږي چې ۱۵۰۰ متره اوږدوالی لري او پکې سلګونو کسانو ته د کار زمینه برابره شوې ده.
