د دوو بهرنیو، الهلال الذهبي او المفتاح الدوبي شرکتونو مسؤلینو په افغانستان کې د لمریزې او بادي برېښنا د تولید په برخه کې پانګونې ته لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د دغو شرکتونو له مسؤلینو سره وکتل. په دغه ناسته کې د نوموړو شرکتونو مسؤلینو وویل، چې په افغانستان کې له ۲۰۰ تر ۴۰۰ میګاواټه په وړتیا د لمریزې او بادي برېښنا په برخه کې پانګونې ته لېواله دي.
د اوبو او انرژي سرپرست وزیر د دوی د لېوالتیا هر کلی وکړ او د دواړو لورو د تخنیکي ټیمونو ترمنځ د پانګونې او د چارو د څرنګوالي په موخه پر همغږي باندې ټینګار وکړ. هغه، وویل چې نور اقدامات باید د تخنیکي ارزونې او د دواړو لورو ترمنځ د هوکړه لیک په لاسلیکولو سره پيل شي.
همدارنګه، ښاغلي منصور د همغږیو او عملي اقداماتو پر چټکتیا باندې ټینګار وکړ.
