د تره خېلو د ۲۵۲ میګاولټ امپیر د نوي سب سټیشن د جوړونې او له چمتلې څخه د تره خېلو تر نوي سب سټیشن پورې د ۲۲۰ کیلو ولټ امپیر لېږد مزي پروژې پرانیستل شوې
دغې پروژې د ریاست الوزرا د سیاسي مرستیال محترم مولوي عبدالکبیر، د اوبو او انرژي د سرپرست وزیر محترم الحاج ملا عبداللطیف منصور، د صنعت او سوداګري وزارت معین محترم مولوي احمدالله زاهد، د افغانستان برېښنا شرکت د اجرائيوي رئيس محترم ډاکټر عبدالباري عمر، د اوبو او انرژي وزارت د مقام سلاکار محترم ډاکټر فاروق اعظم، د اسلامي امارت د نورو لوړ پوړو مسؤلینو، د اوبو او انرژي وزارت د رئيسانو او د سیمې د ګڼ شمېر اوسېدونکو په شتون کې پرانیستل شوې.
د ریاست الوزرا سیاسي مرستیال د دغو پروژو په پرانیست غونډه کې په هېواد کې د شته برېښنا د تولید وړتیاوو ته په اشارې سره یادونه وکړه، چې د اوبو مدیریت او د کورنۍ انرژي د تولید پراختیا د افغانستان د اسلامي امارت په لومړیتوبونو کې ځای لري.
په ورته مهال، د اوبو او انرژي سرپرست وزیر د دغو پروژو په پرانیست غونډه کې د هغوی د ارزښت په هکله خبرې وکړې او ویې ویل، چې د اوبو او انرژي وزارت له لوري په بېلابېلو ولایتونو کې څو ټولګټې پروژې پلي شوې، چې د افغانستان خلک به یې په نږدې راتلونکي کې د بشپړېدو او ګټې ته د سپارلو شاهدان و اوسي.
همدغه راز، د افغانستان برېښنا شرکت اجرائیوي رئيس د هېواد د ځان بسیاینې په برخه کې د انرژي پراختیا یو بنسټیز اصل و باله او څرګنده یې کړه، چې برېښنا شرکت د اوبو او انرژي وزارت په همغږي سره د انرژي د پراختیا په برخه کې دائیمې هلو، ځلو ته ژمن دی.
د یادونې وړ ده، چې دغه پروژې د خصوصي پانګونې له لارې د 18.7 میلیونه آمریکایي ډالرو په ټولیز لګښت سره د ( عوفي بهرام،ګرین سټیټ پاور- ام- بې- آر-سي- سي او نوین سیمیا) داخلي شرکتونو له لوري د دوو کلونو په موده کې پلي کېږي.
د دغو پروژو په بشپړېدو سره به په کابل کې کابو(250,000) دوه سوه او پنځوس زره استوګنیز او سوداګریز مشترکین د برېښنا له نعمت څخه برخمن شي.
همدغه راز، د دغو پروژو په پلي کېدو سره به په کابل کې د برېښنا انرژي د جذب په برخه کې زمینه چمتو او د صنعت کارانو د برېښنا د کموالي ستونزې هم هوارې شي.
