د اوبو او انرژي وزارت له لوري د لوګر ولایت په سفید سنګ کلي کې د ۲۰۰۰ کورنیو لپاره د برېښنا رسونې پروژه پیل شوه
دغه پروژه د ۳۱ میلیونه افغانیو په ټولیز لګښت د لوګر ولایت په سفید سنګ کلي کې د اوبو او انرژي سرپرست وزیر محترم الحاج ملا عبدالطیف منصور، د انرژي معین محترم الحاج ملا عبدالهادي یعقوب، د لوګر مرستیال والي محترم مولوي محمد انور دین پرور، د لوګر د اوبو او انرژي رئيس محترم ملا محمد اسماعیل آخندزاده، د اوبو او انرژي وزارت تخنیکي رئيسانو او د سیمې د ګڼ شمېر اوسېدونکو په شتون کې پرانیستل شوه.
د اوبو او انرژي سرپرست وزیر د دغې پروژې په پرانیست غونډه کې وویل، چې د اسلامي امارت مسؤلین شپه او ورځ مسؤلانه په لږو امکاناتو سره د خلکو د هوساینې او هېواد د پراختیا لپاره هڅې کوي، له همدې کبله له خلکو څخه هم تمه ده، چې د دغه نظام په ارزښت پوه شي او له مسؤلینو سره همکاري وکړي.
هغه زیاته کړه، چې اسلامي امارت د اقتصادي پرمختګ په برخه کې اغېزمن او ارزښتناک ګامونه پورته کړې او په بېلابېلو برخو کې ګڼې پروژې د هېواد په بېلابېلو برخو کې پلې کړې دي.
ښاغلي منصور ټینګار وکړ، چې اوسمهال له هره پلوه د پانګونې او هېواد ته د خدمت کولو لپاره زمینه چمتو شوې او هغه مهال را رسېدلی چې د هېواد پانګوال او سوداګر افغانستان ته را ستانه شي او د دغه هېواد په آبادۍ کې ونډه واخلي.
همدارنګه، د اوبو او انرژي سرپرست وزیر د دغې پروژې پلي کول د محمد آغې ولسوالي د خلکو لپاره اړین وبلل او یادونه یې وکړه، چې د اوبو او انرژي وزارت له لوري به په راتلونکي کې په لوګر ولایت کې د اوبو او انرژي لا زیاتې پروژې پرانیستل شي.
له بلې خوا، د لوګر مرستیال والي د دغې پروژې پلي کول د محمد آغې ولسوالي د خلکو لپاره حیاتي وباله او له خلکو څخه یې وغوښتل چې د دغې پروژې د پلي کولو په برخه کې همکاري وکړي.
په ورته مهال، د پایدارې انرژي عمومي رئيس محترم مولوي عبدالرحمن رحماني د پروژې په هکله په تخنیکي ډول معلومات وړاندې کړل او یادونه یې کړه، چې دغه پروژه به د یو کال په ترڅ کې بشپړه شي او د څه باندې یو میګا ولټ امپیر وړتیا په درلودلو سره به کابو ۲۰۰۰ کورنۍ د برېښنا رسونې تر پوښښ لاندې راولې.
