د اوبو او انرژي وزارت د لاسته راوړنو یو کلن راپور د یو مطبوعاتي کنفرانس په ترڅ کې د حکومت د رسنیو په مرکز کې وړاندې شو
دغه مطبوعاتي کنفرانس ملت ته د دولت د حساب ورکولو تر نامه لاندې د اوبو او انرژي وزارت د دفتر عمومي رئيس محترم قاري محمد عبدالعزیز عزیز، رئيسانو، تخنیکي مسؤلینو او د ملي او نړیوالو رسنیو د استازو په ګډون د حکومت د رسنیو په مرکز کې ترسره شو.
د اوبو او انرژي وزارت د دفتر عمومي رئيس د دغه مطبوعاتي کنفرانس په بهیر کې د اقلیم بدلونونو اغېزو او په اوسنیو شرایطو کې د اوبو د مدیریت ارزښت ته په نغوتې سره له اوبو سرچینو څخه د ګټې اخیستنې قانوني کول، د اوبیزو سرچینو هر اړخیز مدیریت او پراختیا د دغه وزارت له مهمو لاسته راوړنو څخه و باله.
ښاغلي عزیز په خپلو خبرو کې د اوبو او انرژي وزارت کړنو ته په اشارې سره وویل چې دغه وزارت په تېر یو کال کې د هېواد د اوبو د مدیریت او پراختیا په برخه کې مثبت او ارزښتناک ګامونه پورته کړې دي.
په ورته مهال، د اوبو او انرژي وزارت د دفتر عمومي رئيس د کنفرانس په دوام کې د انرژي په سکتور کې د دغه وزارت کړنو ته نغوته وکړه او له ازبکستان، ترکمنستان او تاجکستان هېوادونو سره د برېښنا تړون د غځولو، د هېواد په کچه د انرژي سکتور د پراختیا پنځه کلن پلان او همدارنګه د انرژي د تولید په موخه د پانګونې د جلبولو لپاره اړینې او اغېزمنې هڅې یې په دې برخه کې له مهمو کړنو څخه وګاڼه.
د کنفرانس په پای کې، د اوبو او انرژي وزارت د لاسته راوړنو په هکله د بشپړ معلوماتو د وړاندې کولو برسېره، د خبریالانو پوښتونو ته هم د دغه وزارت د رئيسانو او مسؤلینو له خوا اړین ځوابونه ورکړل شول.
