د اوبو او انرژي سرپرست وزیر د ننګرهار ولایت په نازیانو ولسوالي کې یوه ټولګټه پروژه د اووه لس لکه او اتیا زره ډالرو په ارزښت پرانیسته
د اوبو او انرژي سرپرست وزیر محترم الحاج ملا عبداللطیف منصور د یوې غونډې په ترڅ کې د ننګرهار ولایت په نازیانو ولسوالي کې د ننګرهار د والي، سیمه ییزو مسؤلینو او د سیمې د ګڼ شمېر اوسیدونکو په شتون کې یوه ټولګټه پروژه چې پکې د اوبولګولو کانالونو بیا رغونه، د باران اوبو د ذخیره کولو په موخه چکډم جوړونه او د کاریزونو بیارغونه شامله ده، پرانیسته.
د اوبو او انرژي سرپرست وزیر د نوموړې پروژې د پلي کولو په موخه د جاپان هېواد د پې، ایم، ایس موسسې څخه د قدراني ترڅنګ یادونه وکړه، چې د اسلامي امارت مسؤلین شپه او ورځ د هېواد د آبادي په برخه کې هڅه کوي.
ښاغلي منصور په لنډه توګه د اسلامي امارت لاسته راوړنو ته اشاره وکړه او ټینګار یې وکړ، چې په دې وروستیو کې یوازې د اوبو سرچینو د مدیریت او د انرژي د پراختیا په برخه کې ګڼې پروژې پرانیستل شوې دي.
د یادونې وړ ده، چې دغه پروژه د جاپان هېواد د پې، ایم، ایس موسسې له لوري په سیمه کې پلي کېږي او زمونږ ګڼ شمېر هېوادل به ورڅخه برخمن شي.
