د افغانستان اسلامي امارت د اوبو او انرژي وزیر له ترکي پانګوالو سره په دریو سترو پروژو کې د پانګونې په هکله خبرې، اترې وکړې
۸/۱۰/۱۴۰۴ هـ ل
د اوبو او انرژي وزیر محترم الحاج ملا عبداللطیف منصور د کوتای انسات یوه ترکي شرکت له مسؤلینو سره وکتل.
په دغه لیدنه کې، د نوموړي شرکت مسؤلینو د اوبو او برېښنا بندونو جوړولو په پروژو او همدارنګه د اوبو رسولو په پروژو کې د پانګونې لپاره لېوالتیا څرګنده کړه.
د اوبو او انرژي وزیر د اوبو په سکتور کې د نوموړي شرکت د پانګونې لېوالتیا د هرکلي ترڅنګ، هغوی ته د پانګونې په موخه د ګمبیري اوبولګولو او برېښنا د تولید بند پروژه، له صیاد څخه تر نوي کابل پورې د اوبو رسولو پروژه او له للندر شاتوت څخه تر کابل پورې د اوبو رسولو پروژه وړاندیز کړه.
محترم الحاج ملا عبداللطیف منصور د اوبو او انرژي وزارت له لوري په دغو پروژو کې د پانګونې لپاره د اړینو آسانتیاوو د چمتوکولو په برخه کې د هر اړخیزو همکاریو د ډاډ ترڅنګ، ټینګار وکړ چې د نورو چمتووالو تر لاس لاندې نیولو په موخه، د دواړو لورو ترمنځ دې تخنیکي ناستې ترسره شي.
په ورته مهال، ترکي پانګوالو هم د تخنیکي څېړنو او د پانګونې د نورو پړاوونو د پرمخ وړلو لپاره خپل چمتووالی څرګند کړ او له اوبو او انرژي وزارت سره یې د همکاریو پر دوام ژمنه وکړه.
