د آسیا پراختیایي بانک عمومي رئيس د اوبو او انرژي له سرپرست وزیر سره په لیدنه کې د اوبو او انرژي پروژو په پلي کولو کې د همکاري د بیا پيل په هکله ژمنه وکړه
د اوبو او انرژي سرپرست وزیر محترم الحاج ملا عبداللطیف منصور د اوبو معین محترم مجیب الرحمن عمر آخندزاده، د وزارت مقام د سلاکار محترم ډاکټر فاروق اعظم او یو شمېر رئيسانو په شتون کې په افغانستان کې د آسیا پراختیایي بانک له عمومي رئيس ښاغلي دیوید هیل سره وکتل.
په دغه لیدنه کې، دواړو لورو په افغانستان کې د اوبو او انرژي پروژو په پلي کولو کې د همکاري په ځانګړې توګه د هغو نیمګړو پروژو د بیا پيل په هکله چې مخکې د آسیا پراختیایي بانک له لوري د مالي پلوه تمویلدې، بحث او د اندونو تبادله وکړه.
د اوبو او انرژي سرپرست وزیر په کابل او کندهار ښارونو کې د اوبیزو سرچینو د ورځ تر بلې کمېدو وضعیت ته اشاره وکړه او له آسیا پراختیایي بانک څخه د کابل- پنجشیر اوبو لېږد، د شاه توت للندر ذخیروي بند او د کندهار ولایت د دهلې بند د پراختیا په پروژه کې د همکاري غوښتنه وکړه.
همدارنګه، ښاغلي منصور په هېواد کې د انرژي پراختیا د ارزښت یادونه وکړه او په دې سکتور کې د نوموړي بانک د همکاري غوښتنه وکړه.
له بلې خوا، په افغانستان کې د آسیا پراختیایي بانک عمومي رئيس د اوبو او انرژي وزارت د رهبري له مقاماتو سره ژمنه وکړه، چې دغه بانک هوډمن دی چې په افغانستان کې د اوبو او انرژي پراختیایي پروژو په برخه کې خپلې همکاري بیا پيل کړي.
