خوست ولایت کې د یوه چکډم د جوړېدو د پروژې چارې د څه باندې یو نیم میلیون افغانیو په ارزښت پيل شوې
د خوست ولایت د دوه منده ولسوالي اړوند د انار باغ کلي چکډم د جوړېدو د پروژې چارې د یو میلیون او پنځه سوه او دروېشت زره(۱۵۲۳۰۰۰) افغانیو په ارزښت د شمل- خرم سیندیزې فرعي حوزې د رئيس محترم مولوي عبدالقیوم ثابت، د دوه منده ولسوال محترم الحاج ملا مؤمین ذاکر او یو شمېر نورو سیمه ایزو مسؤلینو په شتون کې پیل شوې.
د دغې پروژې د جوړېدو په پرانیست غونډه کې د شمل- خرم سنیدیزې فرعي حوزې رئيس د هغې د ارزښت په هکله خبرې وکړې او د دغې پروژې د پلي کوونکو مسؤلینو څخه یې وغوښتل چې چارې یې په ښه کیفیت او په ټاکلي وخت سره ترسره کړي.
دغه چکډم د ۲۹ متره اوږدوالي او ۴.۵ متره په جګوالي سره د اوبو او انرژي وزارت په مالي لګښت جوړیږي او د چارو په بشپړېدو سره یې به د ۱۶۸۰۰ متره مکعبه په اندازه د ځمکې لاندې اوبه تعذیه شي او شاوخوا ۸۴۰۰ متره مکعب اوبه هم ذخیره شي او همدارنګه به لسګونه جریبه ځمکه د سیلابونو له ویجاړیو څخه وژغورل شي .
