یوه بنګله دیشي شرکت په افغانستان کې د ۱۰۰ -۱۰۰۰ میګاواټه لمریزې برېښنا انرژي د تولید په پروژو کې پانګونې ته لېوالتیا څرګنده کړه
د اوبو او انرژي وزارت د پانګونې د جلب او جذب رئيس محترم مولوي رحمتولي رحماني د دغه ریاست د آمر محترم مولوي اختر محمد نصرت او د انرژي د برنامو ریاست د یو شمېر تخنیکي مسؤلینو په شتون کې د بي، پي، ټي، ال بنګله دیشي شرکت له رئيس محترم محمد اسحاق ابوالخیر او مل پلاوي سره وکتل او په افغانستان کې د لمریزې برېښنا انرژي د تولید پروژو په برخه کې د پانګونې په هکله بحث او د اندونو تبادله وکړه.
د نوموړي شرکت رئيس د پانګونې د جلب او جذب له رئيس سره په لیدنه کې وویل، دوی لېواله دي چې په افغانستان کې د ۱۰۰-۱۰۰۰ میګاواټه لمریزې برېښنا انرژي د تولید په پروژو کې پانګونه وکړي او په دې برخه کې د همکاري غوښتنه وکړه.
په دغه لیدنه کې، د پانګونې د جلب او جذب رئيس د نوموړي شرکت رئيس او مل پلاوي ته د ښه راغلاست ترڅنګ، د لمریزې برېښنا انرژي د تولید پروژو په برخه کې د هغوی د پانګونې هر کلی وکړ او زیاته یې کړه، چې اوسمهال په افغانستان کې له هره پلوه د پانګونې لپاره زمینه چمتو شوې او مونږ په دې برخه کې همکاري ته چمتو یو.
ښاغلي رحماني په دغه لیدنه کې د روسیې له لوري د افغانستان اسلامي امارت رسمیت پېژندنې ته په اشارې سره څرګنده کړه، چې په افغانستان کې ورځ تر بلې شرایط مخ په ښه کېدو دي او ټول پانګوال باید له دغه رامنځته شوې فرصت څخه په ګټې اخیستنې سره په افغانستان کې د اوبو او انرژي پروژو په برخه کې پانګونه وکړي.
