کابل ولایت کې د واش کلویرت پروژې چارې د څه باندې درې میلیونه افغانیو په ارزښت پیل شوه
د کابل ولایت د استالف ولسوالي د پل چق چق، باغ مقبول، قول ساموسي، قول کرم او قول نعیم کلیو کې د واش کلویرت پروژې چارې د درې میلیونه، شپږ سوه او څلوېښت زره(۳،۶۴۰،۰۰۰) افغانیو په ارزښت پيل شوې.
په نوموړې پروژه کې د واش کلویرت پنځه ودانۍ شاملې دي ، چې د اوبو د غوره مدیریت، د سیلابونو د ویجاړیو د مخنیوي، د کرنیزو ځمکو د خړوبولو او د کارموندنې په موخه پلي کېږي.
د نوموړې پروژې چارې د یو، این، ایف، اې، او سازمان په مالي ملاتړ د کابل د منځني سیندیزې فرعي حوزې تر څارنې لاندې د درې میاشتو په موده کې پلي کېږي، چې د چارو په بشپړېدو سره به یې ۳۵۰ کورنۍ ورڅخه ګټه پورته کړي.
له بلي خوا، د کابل د منځني سیندیزې فرعي حوزې رئيس محترم مولوي نورالله حکمت او ورسره مل تخنیکي ټیم د کابل ولایت په کلکانو ولسوالي کې د ذمه چکډم د پروژې د ودانیزو چارو له بهیر څخه څارنه وکړه او اړوندو مسؤلینو ته یې د چارو دغوره پرمخ وړلو په موخه اړینې لارښوونې وکړې.
