پکتیکا ولایت کې د سلګډي چکډم د جوړولو چارې د څه باندې درې میلیونه افغانیو په لګښت پیل شوې
د پکتیکا ولایت په ارګون ولسوالي کې د سلګډي چکډم د جوړولو چارې د درې میلیونه، شپیته زره، څلور سوه، شپاړلس اعشاره یو(3060416.1) افغانیو په لګښت د پکتیکا ګومل سیندیزې فرعي حوزې تخنیکي سلاکار انجنیر عیسی محمد مسلم او د قراردادي شرکت استازو په شتون کې پیل شوې.
نوموړی چکډم د اوبو او انرژي وزارت په مالي لګښت د 41.4 متره په اوږدوالي، د ځمکې له سطحې څخه د 5 متره په لوړوالي، په تهداب کې د 2 متره ژوروالي او په تهداب کې د 5 متره او په سر کې د 0.8 متره سور سره جوړیږي، چې د 5185 متره مکعب اوبو د زیرمه کولو وړتیا به ولري.
