پکتيا پوهنتون کې زده کړیالانو ته د " پکتيا ولایت کې شته اوبه او د هغو غوره مدیریت" تر سرلیک لاندې ځانګړی سمینار دائر شو.
د پکتیا ولایت د اوبو او انرژي رياست له لوري د پکتيا پوهنتون د علمي څېړنو معاونيت په همغږي سره په دغه پوهنتون کې د افغان نړۍ وال اسلامي پوهنتون د کرنې پوهنځي د دکتورا څانګې زده کړيالانو ته د "په دغه ولایت کې د شته اوبو او د هغو غوره مدیریت" تر سرلیک لاندې ځانګړی سمینار وړاندې شو.
په دغۀ سمینار کې د پکتیا پوهنتون د علمي څېړنو مرستیال پوهندوی دوکتور عبدالوهاب حکمت د سمینار برخوالو ته د ښه راغلاست تر څنګ، په هیواد کې د شته اوبو او د اوبو څخه د ښې استفادې په هکله اړین معلومات هم شریک کړل.
په ورته مهال د پکتيا ولایت د اوبو او انرژي رياست سلاکار انجنیر فضل الرحيم رحيمي په دغهٔ سمینار کې د دغهٔ رياست د مسؤليتونو، لاسته راوړنو، پلانونو، د دغهٔ ولایت په کچه د شته اوبو سرچينو او فرصتونو په هکله هر اړخیز معلومات وړاندې کړل.
