په ننګرهار ولایت کې پنځه ټولګټې پروژې د څه باندې یو دیرش میلیونه افغانیو په ارزښت ګټې اخیستنې ته وسپارل شوې
د ننګرهار ولایت په خوګیانو او شیرزادو ولسواليو کې د کږې، پیره خیلو، پتلو، طوطو او مرکپخیلو کانالونو د بیارغونې او پاکاري پروژې د یو دیرش میلیونه، پنځه سوه، اووه اویا زره، نهه سوه او اته پنځوس افغانیو (۳۱۵۷۷۹۵۸) په ارزښت د ننګرهار سیندیزې حوزې د استازي، د خوګیانو او شیرزادو ولسوالیو د یو شمېر مسؤلینو په ګډون ګټې اخیستنې ته وسپارل شوې.
یاد کانالونه د بیارغونې او پاکاري وروسته د دوه دیرش زره جریبه کرنیزې ځمکې د خړوبولو وړتیا لري او پکې د پنځه لس زره، پنځه سوه او اته دیرش کسانو لپاره د کار زمینه برابره شوې وه.
د یادو پنځو ټولګټو پروژو چارې د UNDP سازمان په مالي ملاتړ د ننګرهار سیندیزې حوزې تر څارنې لاندې د اسلامیک ریلیف موسسې له خوا پلي شوې دي.
د یادولو وړ ده، چې تېره ورځ هم په ننګرهار ولایت کې دوه ټولګټې پروژې د څه باندې دوولس نیم میلیونه افغانیو په ارزښت ګټې اخیستنې ته سپارل شوې وې.
