په میدان وردګ ولایت کې د څه باندې ۳۵ میلیونه افغانیو په ارزښت د پنځو چکډمونو چارې بشپړې او ګټې اخیستنې ته وسپارل شوې
د میدان وردګ ولایت په مرکز میدان ښار او په نرخ، سید آباد او دایمیرداد ولسوالیو کې د 35.5 میلیونه افغانیو په ارزښت د پنځو چکډمونو چارې د یاد ولایت د والي ښاغلي محمد عمري، د میدان ښار سیندیزې حوزې رئيس محترم مولوي عبدالصمد حلیم ، یو شمير نورو سیمه ییزو مسؤلینو او مشرانو په شتون کې په ځانګړو مراسمو سره ګټې اخیستنې ته و سپارل شوې.
د دې پروژو د ګټې اخیستنې په مراسمو کې ښاغلي عمري وویل چې د دې ولایت د اړوندو سکتوري او تخنیکي ریاستونو په همغږي په را روان ۱۴۰۲ لمریز کال کې به د میدان وردګ ولایت په لرې پرتو ولسوالیو کې ۲۰ د اوبو ذخیروي بندونو چارې پيل شي.
په ورته مهال، د میدان ښار سیندیزې حوزې رئيس محترم مولوي عبدالصمد حلیم وویل چې د یادو پروژو چارې د DRC موسسې په مالي ملاتړ د سیندیزې حوزې د مسؤلینو تر دومداره څارنې لاندې د ۹ میاشتو په موده کې بشپړې شوې چې د ۷۹ زره متره مکعب اوبو د ذخیره کولو د وړتیا په لرلو سره به ۳۳۹۰ هکتاره کرنیزه ځمکه خړوبه کړي.
