فورټیسکیو کمپنۍ ته د ۱۲۰ معرفي شویو کارکوونکو سره د انجنیر خان محمد تکل لیدنه.
فورټیسکیو چې یوه اسټرالیاي کمپنۍ ده پلان لري چې په افغانستان کې لوی بندونه جوړ کړي او د دې تر څنګ په دغه برخه کې د اوبو د چارو د تنظیم ملي ادارې نویو ټاکل شویو ۱۲۰ کارکوونکو ته زده کړې ورکړي.
د دغې پروسې لومړني کارونه تر سره شوي و چې نن دغه پروسه بشپړه او له ۱۲۰ کارکوونکو څخه ۷۴ کارکوونکي د دغې برنامې معرفي په موخه د اوبو د چارو د تنظیم ملي ادارې ته را غوښتل شوي وو، دوئ ته د ادارې تګلارو او اجراآت په اړه معلومات ورکړل شول.
د پروګرام په اخر کې د اوبو د چارو د تنظیم ملي ادارې عمومي رئيس ښاغلي انجنیر خان محمد تکل له دغه کارکوونکو سره وکتل او هغوئ ته یې لازمې لارښوونې وکړې او وې ویل" د افغانستان بندونو په برخه کې چې د فورټسکیو کمپنۍ لخوا تاسو ته کوم فرصت برابر شوی دا ستاسو لپاره یو طلای چانس دی چې باید په ښه توګه ترې استفاده وکړئ؛ زه د فورټیسکیو کمپنۍ او د اوبو د چارو د تنظیم ملي ادارې د بشري سرچینو ریاست سره ستاسو د مقررۍ او زده کړو پروسه له نږدې تعقیبوم، دغه پروسه به په ښه توګه او په خپل وخت پر مخ ځي خو له تاسو څخه مې هیله ده چې له وخت څخه ښه استفاده وکړئ تر څو افغانستان په راتلوونکي کې د بندونو په برخه کې مسلکي کسان ولري".
د یادونې وړ ده چې د جمهوري ریاست عالي مقام د هدایت په اساس ۱۲۰ تنه نوي ټاکل شوي کارکوونکو د فورټسکیو کمپنۍ لخوا د افغانستان بندونو په اړه زده کړې ورکول کیږي چې له هغه وروسته به د اوبو د چارو د تنظیم ملي ادارې په چوکاټ کې کار کوي.
د اوبو د چارو د تنظیم ملي اداره
