غزني ولایت کې د ملاخېلو کوچني ذخیروي بند چارې د نږدې پنځه میلیونه افغانیو په لګښت بشپړ او ګټې اخیستنې ته و سپارل شو
د غزني ولایت په واغظ ولسوالي کې د ملا خېلو کوچني ذخیروي بند چارې د ۴ میلیونه ۹۹۰ زره او ۴۵۰ افغانیو په لګښت د ۶۵.۵ متره په اوږدوالي او د بنسټ په ګډون د ۶.۵ متره په لوړوالي او د ۵۰۴۷ متره مکعب زېرمې په وړتیا جوړ او ګټې اخیستنې ته وسپارل شو.
دغه بند د ملاخېلو کلي کاریز سرڅاه ته په نږدې واټن کې جوړشوی، چې د کاریز او ځمکې لاندې اوبو په پیاوړتیا او چاپيریال په ښکلا کې به د پام وړ اغېزه ولري.
د نوموړې پروژې چارې د اوبو او انرژي وزارت په مالي لګښت د غزني د اوبو او انرژي ریاست تر څارنې لاندې پرمخ وړل کېدې، چې پکې یو شمېر کسانو ته د کار زمینه چمتو او د څلورو میاشتو په موده کې بشپړې او ګټې اخیستنې ته وسپارل شو.
