غزني ولایت کې د سیاه ګل ذخیروي بند سروې ترسره شوه
د غزني ولایت د ولاړو اوبو ریاست مسؤلینو د غزني ولایت د مرکز اړوند قلاتي سیمې کې د سیاه ګل ذخیروي بند لومړنۍ، اقتصادي، ټولنیزه، چاپېریالي او توپوګرافي سروې ترسره کړه.
د نوموړي بند په جوړېدو سره به د قلاتي سیمې، امیر محمد خان کلا، غیب قلندر، توحید آباد او پښتون آباد کلي د سیلابونو له ګواښ څخه وژغورل شي او همدارنګه به د پنځه کلیو کاریزونه په مستقیم ډول تغذیه او د ځمکې لاندې اوبو د پياوړتیا لامل هم شي.
له بلې خوا، د غزني ولایت د ولاړو اوبو د سیندیزې فرعي حوزې او د دغه ولایت د کرنې او مالداري ریاست د مسؤلینو ترمنځ د ژورو څاګانو د کېندلو د مخنیوي په هکله د همغږۍ ناسته ترسره شوه.
په دغه ناسته کې پرېکړه وشوه، چې د غزني ولایت په ټولو ولسوالیو کې د ژورو څاګانو د کېندلو په موخه باید د غزني ولایت د ولاړو اوبو ریاست څخه اجازه لیک تر لاسه شي.
