زابل ولایت کې د اوبو په برخه کې د پنځو پرمختیایي پروژو چارې د څه باندې ۱۳ میلیونه افغانیو په لګښت پیل شوې
د زابل ولایت په شینکۍ، ارغنداب او شهر صفا ولسوالیو کې د درېیو چکډمونو او دوو تحکیماتي پروژو د رغونې چارې د څه باندې ۱۳ میلیونه افغانیو په لګښت د زابل د اوبو او انرژي رئیس محترم مولوي عبدالکریم ذوالفقار، د شینکۍ ولسوال محترم زبیر آغا او یو شمېر نورو سیمه ایزو مسؤلینو او قومي مشرانو په شتون کې پيل شوې.
د زابل د اوبو او انرژي رئيس د دغو پروژو په پرانیست غونډه کې د نوموړو پروژو په هکله هر اړخیز معلومات وړاندې کړل او د سیمې له اوسېدونکو څخه یې غوښتنه وکړه، چې د پروژو په ساتنه کې فعاله ونډه واخلي.
د نوموړو پروژو د چارو په بشپړېدو سره به د اوبو د ضایع کېدو د مخنیوي ترڅنګ، کرنیزې ځمکې خړوبې او د سیلابونو د ګواښ کچه هم ټېټه شي.
