د یوه چینایي شرکت رئيس له پنجشیر څخه کابل ته د اوبو د لېږد په پروژه او د لمریزې برېښنا د تولید په پروژو کې پانګونې ته لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د دغه وزارت د یو شمېر مسؤلینو په شتون کې د چین هېواد د خواه فوتین شین شرکت له رئيس او د چین د ملي شرکت له استازي ښاغلي لي شین جییان او مل پلاوي سره وکتل.
په دغه لیدنه کې، د نوموړي شرکت رئيس له پنجشیر څخه کابل ته د اوبو د لېږد، کابل کې د څښاک اوبو د تصفیه کولو او د لمریزې برېښنا د تولید په پروژو کې پانګونې ته لېوالتیا څرګنده کړه.
د اوبو او انرژي سرپرست وزیر په دغه لیدنه کې د نوموړي شرکت د پانګونې د هرکلي ترڅنګ زیاته کړه، چې اوسمهال په افغانستان کې له هره پلوه د پانګونې لپاره زمینه چمتو شوې او مونږ له ټولو بهرنیو او کورنیو پانګوالو څخه غواړو چې د اوبو او انرژي په پروژو کې پانګونه وکړي او په دې برخه کې هر راز همکاري ته چمتو یو.
همدغه راز، د دغې ناستې په پای کې د عملي چارو د پیل په موخه د دواړو لورو د تخنیکي ټیمونو ترمنځ د ګډو ناستو پر ترسره کولو باندې ټینګار وشو.
