د کندهار د دهلې بند د چارو چټکتیا په موخه د همغږۍ جلسه تر سره شوه
د اوبو د چارو د تنظیم ملي ادارې د برنامو مدیریت په مشرۍ د کلو پراختیا وزارت او کرنې او مالدارۍ وزارت سره په همغږۍ د کندهار ولایت د هلې بند د چارو چټکتیا په موخه د همغږۍ جلسه تر سره شوه.
په دغه جلسه کې چې د اوبو د چارو د تنظیم ملي ادارې د برنامو مدیریت مرکزي دفتر رئيس ښاغلی انجنیر سید مقیم سادات، د کلو پراختیا وزارت د برنامو مسؤل بریالی هلالي او د کرنې او مالدارۍ وزارت مسؤل سید مقصود هاشمي او د اړونده ادارو نورو مسؤلینو ګډون کړی وو چې د اړونده ادارو مسؤلینو لخوا په نوبت سره د خپلو کړنو راپور وړاندې شو او د دهلې بند د چارو په چټکتیا یې هر اړخیز بحث وکړ.
په دغه ناسته کې د دهلې بند د چارو په چټکتیا، د استملاک ستونزو حل او د کندهار ولایت مقام او د اړونده ادارو تر منځ په ښه همغږۍ تينګار وشو تر څو د دغې لوی او ملي پروژې چارې چټکې او په خپل وخت ګټې اخیستنې ته وسپارل شي.
په ورته وخت کې د اوبو د چارو د تنظیم ملي ادارې د برنامو مدیریت مرکزي د دفتر رئيس ښاغلي سید مقیم سادات زیاته کړه چې د پروژې د چارو ګړندیتوب لپاره باید د اړونده ادارو رهبریو او د کندهار ولایت مقام تر منځ ګډه ناسته تر سره شي او یو پلاوی وټاکل شي تر څو سیمې ته ورشي او چارې له نږدې وڅاري.
د یادونې وړ ده چې د دهلې بند چې یو له سترو او ملي پروژو څخه دی د کندهار ولایت په ارغنداب ولسوالۍ کې موقعیت لري چې اوسمهال یې په ځینو برخو کار روان دی چې په ۱۴۰۰ کال کې به یې چارې لا ګړندۍ شي.
د اوبو د چارو د تنظیم ملي اداره
