د کاپیسا سیندیزې فرعي حوزې، کرنې او اقتصاد ریاستونو رئيسانو د افغانستان لپاره د ناروي کمیټې له مسؤلینو سره ګډه ناسته ترسره کړه
یاده ناسته د کاپيسا سیندیزې فرعي حوزې رئيس ښاغلي انجنیر کاوه خروش، د کرنې، اوبولګولو او مالدارۍ رئيس ښاغلي مولوي روح الله روحاني او یو شمېر نورو مسؤلینو په ګډون ترسره شوه او په کاپیسا ولایت کې د کرنیزو ودانیو د جوړولو او بیا رغونې په هکله بحث او د نظر تبادله وشوه.
په دې ناسته کې، ښاغلي خروش د اوبو سرچینو په هکله هر اړخیز معلومات وړاندې کړل او د پلان شویو کړنو، د پروژو د سروې لپاره د ساحو ټاکنه او د یادو ریاستونو ترمنځ د همغږیو په هکله خپل اندونه بیان کړل.
د ناستې په پای کې پریکړه و شوه، چې د اړوندو ریاستونو څخه یو ګډ څارنیز ټیم جوړ شي، ترڅو په کاپیسا ولایت کې په دوامداره توګه د ناروي کمیټې د پروژو له چارو څخه څارنه ترسره کړي.
