د کابل ولایت په خاکجبار ولسوالي کې د عامه شتمنیو د رامنځته کولو پروژه پرانیستل شوه
یاده پروژه د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده، د کا بل سیندیزې عمومي حوزې رئيس ښاغلي انجنیر حبیب الرحمن حقپال، د کابل منځني سیندیزې فرعي حوزې د رئیس ښاغلي مولوي ولي محمد تائب، د خاکجبار ولسوالي ولسوال او د یادې ولسوالي د قومي مشرانو په شتون کې پرانیستل شوه او عملي کار یې پیل شو.
دا پروژه چې د اوبو او انرژي وزارت له خوا د سیلابونو د کنترول، د باران اوبو د جمع کولو او مدیریت، د ځمکې لاندې اوبو د سرچینو د پياوړتیا او د کرنیزو ځمکو د خړوبولو په موخه په لاره اچول شوې ده، د باران اوبو د جمع کولو څلور لوی حوضونو او ۱۸۰ کوچني حوضونو د جوړولو، د ۴۰۰ متره په اوږدوالي سره د اوبو لګولو یو کانال او د واټر شیډونو جوړول پکې شامل دي.
یاده پروژه به د شپږو میاشتو په موده کې پلی شي چې د ۶۵۰ کسانو لپاره د کار زمینه رامنځته شوې او د دې پروژې د بشپړیدو وروسته به کابو ۱۰۰ هکتاره کرنیزه ځمکه تر خړوبولو لاندې راشي، چې په غیر مستقیم ډول به نږدې ۲۰ زره کورنۍ ورڅخه برخمنې شي.
د یادولو وړ ده، چې یاده پروژه د څه باندې ۳۸ میلیونه افغانیو په ارزښت د خوړو نړیوال سازمان(WFP) له خوا تمویلیږی او د خاکجبار ولسوالی په بېلابېلو ولسوالیو کې د شلتر فار لایف موسسې (SFL)له خوا پلي کېږي.
