د کابل عمومي حوزوي ریاست په ودانۍ کې د دوو مرکزي ریاستونو د کارکوونکو لپاره د الکترونیکي حاضري یوه پایه دستګاه نصب شوه
د دغې دستګاه د پرانیستې مراسم د اوبو او انرژي وزارت د معلوماتي ټکنالوژي رئيس محترم انجنیر حبیب الرحمن جلالزي، د انرژي پروژو د څارنې او ارزونې رئيس محترم الحاج مولوي فتح الرحمن منصور، د سطحي اوبو سرچینو رئيس محترم انجنیر فضل الله دراني، د سوانحو، ډیټابیس او اجراآتو د ارزونې آمر محترم مولوي فضل الرحمن سعید او همدارنګه د کارکوونکو چارو او د معلوماتي ټکنالوژي ریاستونو د یو شمېر کارکوونکو په شتون کې ترسره شو.
ګډونوالو مسؤلینو په دغو مراسمو کې د الکترونیکي حاضري سیسټم نصب او فعالولو موخه په اداري چارو کې د نظم او انضباط غورهوالی، د روڼتیا لوړوالی او په کابل عمومي حوزوي ریاست کې مېشت د دوه مرکزي ریاستونو( د انرژي څارنې او ارزونې ریاست او د سطحي اوبو سرچینو ریاست) د کارکوونکو پر شتون او نهشتون باندې اغېزمن کنټرول وبلل.
همدارنګه، هغوی ټینګار وکړ چې د کارکوونکو د چارو د مدیریت په برخه کې د الکترونیکي سیسټمونو پليکول د اداري بهیرونو د عصريکولو، د کارکوونکو د حاضري د معلوماتو د کره ثبت، د لاسي لاسوهنو د کمولو او په کاري چاپیریال کې د حسابورکونې کچې د لوړولو په لور یو اړین ګام بلل کېږي.
د یادونې وړ ده، چې د الکترونیکي حاضري پليکول، د اداري چارو په آسانتیا، د روڼتیا پیاوړتیا، د وخت مدیریت غورهوالي او د کارکوونکو کاري اغېزمنیا لوړولو په برخه کې اغېزمن رول لوبوي.
