د پکتیا ولایت په زرمت ولسوالي کې د خاتم الانبیا دارالایتام نوې ودانۍ بشپړه او ګټې اخیستنې ته وسپارل شوه
د دغه ودانۍ ګټې ته د سپارلو غونډه د حج او اوقاف وزارت معین محترم شیخ عزیز الرحمن منصور، د اوبو او انرژي وزارت د دفتر د عمومي رئيس محترم قاري عبدالعزیز عزیز د سرې میاشتې د ځوانانو د رضا کارانو د رئيس محترم مولوي عارف الله منصور، علماوو، د ترکیې هېواد د اډیف خیریه بنسټ د مسؤلینو، ځايي مسؤلینو او د پکتیا ولایت د ګڼ شمېر اوسېدونکو په شتون کې په نوموړي دارالایتام کې ترسره شوه.
په ورته مهال، شیخ عزیز الرحمن منصور په دغه مراسمو کې اسلامي نظام یې یو الهي نعمت وباله او ټينګار یې وکړ، هر قدم چې د یتیمانو د مرستې او همکاري لپاره واخیستل شي د اسلام په سپیڅلي دین کې ځانګړی ځای لري.
همدغه راز، مولوي عارف الله منصور د نوموړي ودانۍ په غونډه کې یتیمانو ته د غوره ښوونې د زمینې په برابرولو کې د هغې ارزښت ته اشاره وکړه او د اډیف خیريه موسسې او د ترکيي د نورو سوداګرو څخه چې د نوموړې ودانۍ د جوړولو د پروژې په تمویل کې مرسته کړې، ستاینه وکړه. هغه همدارنګه د اوبو او انرژي د سرپرست وزیر محترم الحاج ملا عبداللطیف منصور پیغام د هغوی په استازیتوب د اډیف خیرېه بنسټ د مسؤلینو او نورو ګډونوالو په شتون کې ولوست.
د دغې غونډې په دوام کې د اسلامي امارت او د ترکیې هېواد د اډیف خیريه موسسې یو شمېر مسؤلینو خبرې وکړې او د هغو یتیمیانو د ښوونې په برخه کې چې پلرونو یې خپل خواږه ځانونه د خدای د کلمې د لوړولو او د هېواد د آزادي لپاره قرباني کړې، د دغه دارالایتام د ارزښت په هکله یادونه وکړه.
باید یادونه وشي، چې ددغه ودانۍ د بنسټ ډبره یو کال وړاندې د اوبو او انرژي د سرپرست وزیر محترم الحاج ملا عبداللطیف منصور له لوري اېښودل شوې وه.
په ورته مهال، د نوې ودانۍ ګټې ته د سپارلو په غونډه کې د نوموړي دارالایتام لپاره د یو باب طعام خونې د بنسټ ډبره هم کښېښودل شوه.
د یادونې وړ ده، چې د خاتم الانبیا دار الایتام د لومړي ځل لپاره په ۱۴۴۱ ه ق کال کې د محترم ملا عبداللطیف منصور له لوري د پکتیا ولایت په زرمت ولسوالي کې تاسیس شوه، چې اوسمهال نږدې ۲۰۰ کسان هلته د دیني او عصري علومو په زدکړو بوخت دي.
