د پکتیا سیندیزې فرعي حوزې رئيس د سویل ختیځ زون د انرژي آمریت له کارکوونکو سره ناسته ترسره کړه
د پکتيا سينديزې فرعي حوزې رئیس ښاغلي مولوي محمد کریم فاتح د سويل ختيځ زون د انرژي آمريت له کارکوونکو سره د چارو د سمون، همغږي او ګړنديتوب په موخه غونډه وکړه.
په دغه غونډه کې ښاغلي فاتح د ياد آمريت په شته امکاناتو او اړتياوو رڼا واچوله. هغه د انرژي له ترلاسه کيدونکو سرچينو څخه يادونه وکړه او له هغوى څخه د ګټه اخيستو په موخه يې اړوندې برخې ته لازمې سپارښتنې او لارښوونې وکړې.
همدارنګه نوموړي له مسؤلینو وغوښتل، يادو شويو موخو ته د رسيدو لپاره دې هر اړخيز پلان ترتيب او تر پوښښ لاندې دې ونيول شي.
د ياد آمريت، آمر ښاغلي انجنير شمس اللّٰه د امکاناتو او نورو اړتياوو په واک کې ورکولو څخه خوښي څرګنده کړه. نوموړي او نورو کارکوونکو خپل مسؤلیت لومړيتوب وبالۀ او د غوره کاري چوپړتياوو ترسره کول يې ستره موخه وبلله.
