د پکتيا سينديزي فرعي حوزې رياست د کار په مقابل کې غذا ولايتي کمېټې د پينځمې ناستې کوربه و.
د پکتيا ولايت د کار په مقابل کې غذا ولايتي کمېټې خپله پينځمه ناسته د کمېټې د غړيو رياستونو استازو په ګډون سره د پکتيا سينديزي فرعي حوزې رياست کې، په داسې حال کې ترسره کړه، چې د ولايت مقام د بشري سرچينو رئیس مولوي عبدالمالک يې مشري کوله.
دغه ناسته چې، د کار د عملاً پېلېدو د امکاناتو په بسيج کولو او د خپل منځي لا ښې همغږۍ په موخه جوړه شوې وه، د پېل وينا يې د ولايت مقام د بشري سرچينو رئیس مولوي عبدالمالک وکړه نوموړي د ناستې ګډونوالو ته ښه راغلاست وویل د کار په مقابل کې غذا پروسې په اړه يې خپل مالومات له ګډونوالو سره شريک کړل او د يادې کمېټې د اړتياوو پوره کولو ژمنه يې وکړه.
په ياده کمېټه کې د کليو او پراختيا رياست استازي حبیب الله خوشحال د يادې پروسې د کار پر ډول، څرنګوالي او ميکانيزم هر اړخيز بحث ورکړ.
د سينديزي فرعي حوزې رياست استازي نقيب الله صادق د دې پروسې د چارو د ښه پرمخ وړلو او غوره مديريت په موخه ترتیب شوي تخنيكي اړين اسناد له ګډونوالو سره شريک کړل، چې د ناستې ګډونوالو له لوري وستايل شول.
د پکتيا سينديزي فرعي حوزې رياست رئیس مولوي محمد کریم فاتح د ګډونوالو نظرونه د قدر وړ وبلل او د پرېکړې په ډول يې هغه جمع او وروستي کړل.
ددې لپاره چې، د يادې پروسې چارې چټکې، ګړندۍ او په دقيق ډول پرمخ ولاړې شي، څلور کاري ګډې تخنیکي ډلې رامنځته شوې؛ نوموړو ډلو ته د چارو د عملاً پېل کېدو په موخه مساويانه ساحې په نخښه شوې.
ياده دې وي چې د يادې پروسې عملاً چارې به په ډېر نېژدې وخت کې پېل شي.
