د قرغې بند اوبه د یاد بند د حقابه لرونکو د ګټې اخیستنې په موخه خوشې شوي
د منځنۍ کابل سیندیزې فرعي حوزې رئيس محترم مولوي ولي محمد تائب د یادې سیندیزې حوزې له یو شمېر تخنیکي مسؤلینو سره د قرغې بند اوبه د نوموړي بند د حقابه لرونکو د ګټې اخیستنې په موخه خوشې کړې.
د کابل منځنۍ سیندیزې فرعي حوزې رئیس محترم مولوي ولي محمد تائب د قرغې بند د اوبو د خوشې کولو پر مهال د نوموړي بند د اوبو د زیاتوالي له کبله خوښي څرګنده کړه او د هغې خوشې کول یې تر خړوبولو لاندې ساحو د اوبو د کموالي ستونزو د هوارولو او د ځمکې لاندې اوبو د پیاوړتیا لپاره ګټور او ارزښتناک وبلل.
په ورته مهال، د پغمان ولسوالي عمومي ساحوي مدیر انجنیر محمد اسماعیل تر قرغې بند لاندې خړوبوونکو ساحو او حقابه لرونکو په هکله اړین معلومات وړاندې کړل.
باید یادونه وکړو، چې له تېر کال را پدې خوا تر اوسه پورې د اوبو او انرژي وزارت د ځینو نړیوالو موسساتو په همکاري سره د قرغې بند په ساحې او د هغې په پورتنۍ برخه کې د بیارغونې، پاکاري ، ساتنې او مراقبتي څو پروژې پلې کړې چې نوموړي پروژې د قرغې بند د اوبو د زیاتوالي په برخه کې ارزښتناکه اغېزې لرلي دي.
