د غوربند – چاریکار سیندیزې فرعي حوزې رئيس د اوبو او انرژي وزارت له سلاکار سره وکتل
د غوربند- چاریکار سیندیزې فرعي حوزې رئيس محترم انجنیر مجیب الرحمن حبیبی د خپل کار په دفتر کې د اوبو او انرژي وزارت له سلاکار محترم ډاکټر فاروق اعظم سره وکتل او په یاده سیندیزه حوزه کې یې شته ستونزې وسره شریکې کړې.
په یاده لیدنه کې د سیندیزې حوزې رئيس، واټر پمپ کانال ته د سولریزې برېښنا نښلولو، د پروان په عمومي کانال کې د رسوبي موادو زیاتوالی، د سیلبرونو او سیفونو د تخریب او په پروان ولایت کې د اوبو د کموالي ستونزې له ښاغلي اعظم سره شریکې کړې.
د اوبو او انرژي وزارت سلاکار په یاده ناسته کې ژمنه وکړه چې یادې ستونزې به د وزارت له رهبري سره شریکې کړي.
